ຂ່າວໃໝ່ :

        ຕອນເຊົ້າວັນທີ 13 ພະຈິກ 2017 ຢູ່ທີ່ຫ້ອງປະຊຸມຊັ້ນ 2 ຫ້ອງວ່າການປົກຄອງເມືອງຮຸນ ໄດ້ເປີດກອງປະຊຸມສະຫຼຸບວຽກງານລົງກໍ່ສ້າງຮາກຖານຮາກການເມືອງ 2 ບ້ານສາມສ້າງ ບ້ານນາຊຽງດີ ແລະ ບ້ານສີບຸນເຮືອງ ຂຶ້ນຢ່າງເປັນທາງການ. ພາຍໃຕ້ການເປັນປະທານ ຂອງທ່ານ ຄຳພຽງ ຢາຈົງວາ ຮອງເລຂາພັກແຂວງ-ຮອງເຈົ້າແຂວງອຸດົມໄຊ, ເປັນກຽດເຂົ້າຮ່ວມມີທ່ານ ບຸນຄົງ ຫຼ້າຈຽມພອນ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງຮຸນ, ມີທ່ານ ວັນນາ ແກ້ວສັນຕິ ກຳມະການພັກແຂວງ ຫົວໜ້າຫ້ອງວ່າການປົກຄອງແຂວງອຸດົມໄຊ ຜູ່ຮັບຜິດຊອບວຽກງານກໍ່ສ້າງຮາກຖານການເມືອງຂັ້ນແຂວງປະຈຳເມືອງຮຸນ, ມີພະແນການກກ່ຽວຂ້ອງຂັ້ນແຂວງ, ມີຄະນະປະຈຳພັກເມືອງ ຄະນະພັກ ຫົວໜ້າຫ້ອງການ ແລະ ເລຂາຄະນະພັກຮາກຖານ ແລະ ນາຍບ້ານ 2 ບ້ານສາມສ້າງ ເຂົ້າຮ່ວມຢ່າງພ້ອມພຽງ.

       ກອງປະຊຸມໄດ້ຮັບຟັງການລາຍງານໂດຍຫຍໍ້ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບວຽກງານກໍ່ສ້າງຮາກຖານການເມືອງທົ່ວເມືອງ. ຈາກນັ້ນ ທ່ານ ວັນນາ ແກ້ວສັນຕິ ກຳມະການພັກແຂວງ ຫົວໜ້າຫ້ອງວ່າການປົກຄອງແຂວງ ຜູ່ຮັບຜິດຊອບວຽກງານກໍ່ສ້າງຮາກຖານການເມືອງຂັ້ນແຂວງປະຈຳເມືອງຮຸນ ໃຫ້ກຽດຂຶ້ນລາຍງານວຽກງານກໍ່ສ້າງຮາກຖານການເມືອງ ຢູ່ 2 ບ້ານສາມສ້າງ, ເມືອງຮຸນເປັນເມືອງທົດລອງສາມສ້າງ ຕາມທີ່ແຂວງໄດ້ກຳນົດມີ 2 ຈຸດສຸມຄື: ຈຸດສຸມນາຊຽງດີ ແລະ ຈຸດສຸມສີບຸນເຮືອງ; ທັງສອງຈຸດນີ້ ພວມກໍາລັງເອົາໃຈໃສ່ຈັດສັນພື້ນຖານໂຄງລ່າງ ໃຫ້ຫັນເຂົ້າສູ່ລະບົບຕົວເມືອງນ້ອຍ ຕາມຕິດ 3 ສ້າງ ແລະ ທິດທາງແຜນການຈັດຕັ້ງປະຕິບັດໃນຕໍ່ໜ້າ, ຈະສືບລົງເຄື່ອນໄຫວເກັບກຳສັງລວມຂໍ້ມູນການກໍ່ສ້າງພັກ - ພະນັກງານໃຫ້ລະອຽດ, ສືບຕໍ່ປັບປຸງອົງການປົກຄອງແຕ່ລະຂັ້ນຂອງເມືອງ-ບ້ານ ເຫັນວ່າບໍ່ທັນຖືກຕ້ອງ, ເອົາໃຈໃສ່ຄົ້ນຄວ້ານິຕິກຳກ່ຽວກັບການກໍ່ສ້າງຮາກຖານການເມືອງຕິດພັນກັບວຽກງານສາມສ້າງໃຫ້ເລິກເຊິງກວ່າເກົ່າ. ໃນໂອກາດດັ່ງກ່າວ ທ່ານ ຄຳພຽງ ຢາຈົງຢາ ຮອງເລຂາພັກແຂວງ-ຮອງເຈົ້າແຂວງ ໄດ້ຂຶ້ນໂອ້ລົມຕໍ່ກອງປະຊຸມ ກ່ອນອື່ນທ່ານກໍ່ໄດ້ຍ້ອງຍໍຊົມເຊີຍມາຍັງຄະນະຊີ້ນຳຂັ້ນແຂວງ ແລະ ຂັ້ນເມືອງ ທີ່ໄດ້ຈັດຕັ້ງປະຕິບັດວຽກງານໃນໄລຍະຜ່ານມາ, ພ້ອມທັງຊີ້ນຳກ່ຽວກັບໜ້າວຽກຕ່າງໆ ແລະ ທ່ານຍັງໄດ້ຮຽກຮ້ອງໃຫ້ແຕ່ລະພາກສ່ວນທີ່ກ່ຽວຂ້ອງ ຈົ່ງພ້ອມກັນເປັນເຈົ້າການຕ້ານ ແລະ ສະກັດກັ້ນດ້ານປະກົດການຫຍໍ້ທໍ້ທີ່ເກີດຂຶ້ນໃນສັງຄົມ  ເປັນຕົ້ນແມ່ນບັນຫາຢາເສບຕິດ ທັງນີ້ກໍ່ເພື່ອເຮັດໃຫ້ບ້ານເມືອງມີຄວາມສະຫງົບສຸກ.