ຂ່າວໃໝ່ :

            ຕອນບ່າຍຂອງວັນທີ 7 ພະຈິກ 2017 ນີ້ ເມືອງຮຸນ ແຂວງອຸດົມໄຊ ໄດ້ເປີດພິທີການແຂ່ງຂັນກິລາບານເຕະຊາຍ ແລະ ບານສົ່ງຍິງ-ຊາຍ ລຸ້ນທົ່ວໄປປະຈຳປີ 2017 ຢູ່ທີ່ສະໜາມກິລາຂອງເມືອງ ເພື່ອຂ່ຳນັບຮັບຕ້ອນວັນຊາດ ທີ 2 ທັນວາ ຄົບຮອບ 42 ປີ ຂຶ້ນຢ່າງເປັນທາງການ ໂດຍການເຂົ້າຮ່ວມເປັນປະທານຂອງທ່ານ ໄລພອນ ລິດຕະວົງ ຮອງເຈົ້າເມືອງ-ເມືອງຮຸນ, ມີທ່ານ ຜາ ພັນທະວົງ ຮັກສາການຫົວໜ້າຫ້ອງການສຶກສາທິການ ແລະ ກິລາເມືອງ, ມີຄະນະຮັບຜິດຊອບໃນການຈັດການແຂ່ງຂັນກິລາຕາງໜ້າແຕ່ລະທິມ ແລະ ບັນດານັກກິລາເຂົ້າຮ່ວມ.

ພິທີດັ່ງກ່າວ ທ່ານ ທອງພັນ ອິນຈຳປາ ຮອງຫົວໜ້າຫ້ອງການສຶກສາທິການ ແລະ ກິລາເມືອງຮຸນ ຂຶ້ນຜ່ານບົດລາຍງານການກະກຽມຈັດຕັ້ງການແຂ່ງຂັນກິລາປະເພດຕ່າງໆ ເພື່ອຂ່ຳນັບຮັບຕ້ອນວັນຊາດ ທີ 2 ທັນວາ ຄົບຮອບ 42 ປີ ປະຈຳປີ 2017; ການແຂ່ງຂັນກິລາໃນຄັ້ງນີ້ ມີ 2 ປະເພດຄື ບານເຕະເດີ່ນໃຫຍ່ 16 ທິມ ແລະ ມີບານສົ່ງຍິງ 7 ທິມ ແລະ ບານສົ່ງຊາຍ 8 ທິມ.

ໃນການເປີດສະໜາມຄູ່ທຳອິດລະຫວ່າງບ້ານນາໂຄ້ງພົບກັບບ້ານໂພນສະຫວັນ ຜົນປະກົດອອກມາ ທັງສອງທິມສະເໝີກັນ (ໜຶ່ງປະຕູຕໍ່ໜຶ່ງ).