ຂ່າວໃໝ່ :

                  ຕອນເຊົ້າຂອງວັນທີ 2 ພະຈິກ 2017 ນີ້ ຢູ່ທີ່ສະໂມສອນບ້ານສົມໄຊ ເມືອງຮຸນ ແຂວງອຸດົມໄຊ ໄດ້ຈັດພິທີປະກາດຮັບຮອງ ບ້ານສົມໄຊ ເປັນບ້ານປ້ອງກັນຊາດເຂັ້ມແຂງ ບ້ານທີ 1 ຂອງເມືອງຮຸນ ແລະ ບ້ານ 34 ຂອງແຂວງອຸດົມໄຊ ຂຶ້ນຢ່າງເປັນທາງການ ພາຍໃຕ້ການເປັນປະທານຂອງທ່ານ ພັທ ບຸນແພງ ລໍນີຈັນ ຮອງເລຂາພັກເມືອງ ຫົວໜ້າກອງບັນຊາການ ປກສ ເມືອງຮຸນ ແລະ ເປັນກຽດເຂົ້າຮ່ວມຂອງທ່ານ ພັທ ທອງພັນ ໄຕໂພນສະຫວັນ ຄະນະພັກ ກອງບັນຊາການທະຫານ ແຂວງອຸດົມໄຊ, ມີທ່ານ ພັຕ ສີພັນ ລືນໄຊຟອງ ຮອງເລຂາຄະນະພັກຮາກຖານ ຫົວໜ້າການເມືອງ ກອງບັນຊາການທະຫານເມືອງຮຸນ, ມີທ່ານ ໄຊທອງ ໄຊຍະຄຳ ເລຂາຄະນະພັກຮາກຖານ-ນາຍບ້ານ ບ້ານສົມໄຊ, ມີແຂກຖືກເຊີນຂັ້ນເມືອງ, ບ້ານອ້ອມຂ້າງ ແລະ ພໍ່ແມ່ປະຊາຊົນພາຍໃນບ້ານສົມໄຊເຂົ້າຮ່ວມຢ່າງພ້ອມພຽງ.

          ໃນພິທີ ທ່ານ ພັຕ ເຕົາພະຈັນ ແພງເພັດ ຄະນະພັກ ຮອງຫົວໜ້າການເມືອງ ກອງບັຊາການທະຫານເມືອງຮຸນ ຂຶ້ນຜ່ານບົດສະຫຼຸບຂໍ້ແຂ່ງຂັນການສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງ ແລະ ທິດທາງແຜນການ. ບ້ານສົມໄຊເປັນບ້ານຊົນເຜົ່າກຶມມຸ ປະກອບມີ 263 ຫຼັງຄາເຮືອນ, ມີ 310 ຄອບຄົວ, ມີ 1,430 ຄົນ ຍິງ 763 ຄົນ; ໄດ້ຮັບຮອງຄອບຄົວປ້ອງກັນຊາດເຂັ້ມແຂງ 220 ຄອບຄົວ ແລະ ໄດ້ຮັບໃບຢັ້ງຢືນຮັບຮອງເປັນບ້ານປ້ອງກັນຊາດເຂັ້ມແຂງບ້ານທີ 1 ຂອງເມືອງຮຸນ. ຈາກນັ້ນກໍ່ເປັນກຽດກ່າວມອບໃບຢັ້ງຢືນຮັບຮອງບ້ານປ້ອງກັນຊາດເຂັ້ມແຂງ ໂດຍທ່ານ ພັທ ທອງພັນ ໄຕໂພນສະຫວັນ ແລະ ກ່າວມອບໃບຢັ້ງຢືນຄອບຄົວປ້ອງກັນຊາດເຂັ້ມແຂງ ໂດຍທ່ານ ພັຕ ສີພັນ ລືນໄຊຟອງ ຫົວໜ້າການເມືອງ ກອງບັຊາການທະຫານເມືອງຮຸນ ເຊິ່ງກ່າວຮັບໂດຍ ທ່ານ ຊາຍທອງ ໄຊຍະຄຳ ນາຍບ້ານ ບ້ານສົມໄຊ.

          ຕອນທ້າຍຂອງພິທີກໍ່ໄດ້ຮັບຟັງການໂອ້ລົມຂອງທ່ານ ພັທ ບຸນແພງ ລໍນີຈັນ ຮອງເລຂາພັກເມືອງ ຫົວໜ້າກອງບັນຊາການ ປກສ ເມືອງຮຸນ ກ່ອນອື່ນທ່ານກໍ່ໄດ້ຍ້ອງຍໍຊົມເຊີຍ ຜົນງານຂອງຄະນະພັກ-ຄະນະກອງບັນຊາການທະຫານເມືອງຮຸນ, ອົງການປົກຄອງບ້ານ ແລະ ພໍ່ແມ່ປະຊາຊົນພາຍໃນບ້ານສົມໄຊ ທີ່ພ້ອມກັນເອົາໃຈໃສ່ປະຕິບັດຂໍ້ແຂ່ງຂັນ ວຽກງານປ້ອງກັນຊາດເຂັ້ມແຂງ ຈົນໄດ້ຮັບຜົນສຳເລັດຕາມຄາດໝາຍທີ່ວາງໄວ້ ເຊິ່ງທ່ານຍັງໄດ້ຮຽກຮ້ອງມາຍັງ ຄະນະພັກ ອົງການປົກຄອງບ້ານ ກໍ່ຄືພໍ່ແມ່ປະຊາຊົນພາຍໃນບ້ານ ຕ້ອງໄດ້ເອົາໃຈໃສ່ສືບຕໍ່ຮັກສາມູນເຊື້ອ ແລະ ຜົນງານທີ່ຍາດມາໄດ້ ພ້ອມທັງເອົາໃຈໃສ່ວຽກງານປ້ອງກັນຊາດປ້ອງກັນຄວາມສະຫງົບ ເພື່ອໃຫ້ຮັບປະກັນສະຖຽນລະພາບທາງດ້ານການເມືອງ ແລະ ໜັກແໜ້ນເຂັ້ມແຂງດ້ານການຈັດຕັ້ງຕະຫຼອດໄປ.