ຂ່າວໃໝ່ :

ຕອນເຊົ້າວັນທີ 31 ຕຸລາ 2017 ນີ້ ບ້ານນໍ້າລຽນ ເມືອງຮຸນ ແຂວງອຸດົມໄຊ ໄດ້ຈັດພິທີປະກາດເປັນບ້ານວັດທະນະທໍາ ຂຶ້ນຢ່າງເປັນທາງການ. ພາຍໃຕ້ການເປັນປະທານຂອງ ທ່ານ ບຸນຕິບ ປັນຍາ ເລຂາໜ່ວຍພັກ ນາຍບ້ານ ນ້ຳລຽນ ໂດຍການເປັນກຽດເຂົ້າຮ່ວມຂອງທ່ານ ບຸນແທນ ສຸພັດທອນ ຄະນະປະຈຳພັກເມືອງ ປະທານແນວລາວສ້າງຊາດເມືອງຮຸນ, ມີທ່ານ ຄຳພອນ ນາມມະກອນ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ, ມີແຂກຖືກເຊີນ, ອົງການຈັດຕັ້ງບ້ານ ຄູ-ອາຈານ ແລະ ປະຊາຊົນພາຍໃນບ້ານເຂົ້າຮ່ວມຢ່າງຫຼວງຫຼາຍ.

ພິທີດັ່ງກ່າວ ທ່ານ ບຸນຕິບ ປັນຍາ ເລຂາໜ່ວຍພັກ ນາຍບ້ານນ້ຳລຽນ ໄດ້ຂຶ້ນຜ່ານບົດສະຫຼຸບກ່ຽວກັບການເຄື່ອນໄຫວວຽກງານໃນການສ້າງບ້ານວັດທະນະທຳໃນສົກປີ 2016-2017 ຂອງບ້ານ, ບ້ານນໍ້າລຽນມີພົນລະເມືອງທັງໝົດ 295  ຄົນ, ຍິງ 194 ຄົນ, ມີຄົວເຮືອນ 69 ຄົວເຮືອນ, 77 ຄອບຄົວ ເຊິ່ງແມ່ນບ້ານເຜົ່າກຶມມຸ 100%. ພາຍໃນບ້ານແມ່ນຖືເອົາອາຊີບປູກຝັງ-ລ້ຽງສັດເປັນຕົ້ນຕໍ ເຊິ່ງສະແດງໃຫ້ເຫັນມີເນື້ອທີ່ປູກພືດເປັນສິນຄ້າເປັນຕົ້ນແມ່ນສາລີ. ຈາກນັ້ນ ໃນພິທີໄດ້ມອບໃບຍັ້ງຍືນຄອບຄົວວັດທະນະທໍາ ຈໍານວນ 65 ຄອບຄົວ ເຊິ່ງກ່າວມອບໃນຄັ້ງນີ້ແມ່ນທ່ານ ຄຳພອນ ນາມມະກອນ ຫົວໜ້າຫ້ອງການຖະແຫຼ່ງຂ່າວ,ວັດທະນະທຳ ແລະ ທ່ອງທ່ຽວເມືອງ ແລະ ມອບໃບຢັ້ງຢືນບ້ານວັດທະນະທຳໃຫ້ບ້ານນ້ຳລຽນ ກ່າວມອບໂດຍ ທ່ານ ບຸນແທນ ສຸພັດທອນ ປະທານແນວລາວສ້າງຊາດເມືອງຮຸນ.

          ເນື່ອງໃນໂອກາດດັ່ງກ່າວນີ້ ທ່ານ ບຸນແທນ ສຸພັດທອນ ປະທານແນວລາວສ້າງຊາດເມືອງຮຸນ ໄດ້ຖືເອົາໂອກາດນີ້ໂອ້ລົມມາຍັງປະຊາຊົນບ້ານ ມີຄຳເຫັນຊີ້ນຳ ເພື່ອເປັນເຂັມທິດເຍືອງທາງ ໃຫ້ອົງການປົກຄອງບ້ານ ແລະ ພໍ່ແມ່ປະຊາຊົນບັນດາເຜົ່າເອົາໃຈໃສ່ສືບຕໍ່ກໍ່ສ້າງ ແລະ ຮັກສາມູນເຊື້ອບ້ານວັດທະນະທຳຂອງຕົນ ໃຫ້ຍືນຍົງຕະຫຼອດໄປ ແລະ ທ່ານໄດ້ເນັ້ນໜັກຫຼາຍບັນຫາທີ່ສຳຄັນ ໂດຍສະເພາະແມ່ນວຽກງານ ປກສ-ປກຊ ບ້ານໃຫ້ມີຄວາມເຂັ້ມແຂງ, ມີຄວາມເປັນລະບຽບຮຽບຮ້ອຍ, ເດັດດ່ຽວ, ສະກັດກັ້ນປະກົດການຫຍໍ້ທໍ້ຢູ່ໃນສັງຄົມ ໃຫ້ມີຄວາມສະຫງົບໂດຍພື້ນຖານ.