ຂ່າວໃໝ່ :

ຕອນເຊົ້າ 26 ຕຸລາ 2017 ນີ້ ຢູ່ທີ່ສະໜາມກິລາເມືອງຮຸນ ແຂວງອຸດົມໄຊ ໄດ້ເປີດພິທີປະກາດຮັບຮອງສະຫະ ພັນກຳມະບານເມືອງຮຸນເປັນສະຫະພັນກຳມະບານ 5 ເປັນເຈົ້າຂຶ້ນຢ່າງເປັນທາງການ. ໂດຍການເປັນປະທານຂອງ ທ່ານ ບຸນກຽນ ພິລາວົງ ຄະນະບໍລິຫານງານສະຫະພັນກຳມະບານແຂວງ ປະທານສະຫະພັນກຳມະບານເມືອງຮຸນ ເຊິ່ງເປັນກຽດເຂົ້າຮ່ວມຂອງ ທ່ານ ຄຳພຽງ ຢາຈົງວາ ຮອງເລຂາພັກ-ຮອງເຈົ້າແຂວງອຸດົມໄຊ, ມີທ່ານ ບຸນຄົງ ຫຼ້າຈຽມພອນ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງຮຸນ, ມີແຂກການນຳແຂວງ-ເມືອງ, ແຂກເຊີນຈາກ 6 ເມືອງອ້ອມຂ້າງ, ປະທານໜ່ວຍ, ສະມາຊິກກຳມະບານ ຮາກຖານ ແລະ 10 ບ້ານເທດສະບານເມືອງເຂົ້າຮ່ວມຢ່າງຫຼວງຫຼາຍ.

 

ພິທີດັ່ງກ່າວ ທ່ານ ບຸນກຽນ ພິລາວົງ ປະທານສະຫະພັນກຳມະບານເມືອງ ໄດ້ຂຶ້ນຜ່ານບົດສະຫຼຸບກ່ຽວກັບການຈັດຕັ້ງປະຕິບັດວຽກງານຂະບວນການແຂ່ງຂັ້ນ 5 ເປັນເຈົ້າ ໃນໄລຍະຊຸມປີຜ່ານມາ ແລະ ທິດທາງແຜນການແຂ່ງຂັ້ນ 5 ເປັນເຈົ້າ ປະຈຳປີ 2018. ທ່ານ ໄດ້ຍົກໃຫ້ເຫັນຫຼາຍບັນຫາທີ່ພົ້ນເດັ່ນ ໂດຍສະເພາະແມ່ນແຜນພັດທະນາເສດຖະກິດ-ສັງຄົມ ມີການຂະຫຍາຍໃນລະດັບ 8.5% ຕໍ່ປີ, ລວມຍອດຜະລິດຕະພັນພາຍໃນ ບັນລຸໄດ້ 728,943 ຕື້ກວ່າກີບ, ລາຍຮັບສະເລ່ຍຕໍ່ຫົວຄົນ ປະມານ 9 ລ້ານກວ່າກີບຕໍ່ຄົນຕໍ່ປີ ເທົ່າກັບ 1,197 ໂດລາສະຫະລັດຕໍ່ຄຜົນຕໍ່ປີ. ປະຈຸບັນຄະນະບໍລິຫານງານກຳມະບານເມືອງ ມີ 13 ສະຫາຍ ຍິງ 2 ສະຫາຍ, ໃນນີ້ຍົກຍ້າຍໄປຕ່າງເມືອງ 1 ສະຫາຍ, ມີຄະນະກຳມະການຮາກຖານໜ່ວຍ 178 ສະຫາຍ ຍິງ 52 ສະຫາຍ; ທົ່ວເມືອງ 71 ກົມກອງ , 29 ຮາກຖານ 42 ໜ່ວຍ, ມີສະມາຊິກກຳມະບານ 1,244 ສະຫາຍ ຍິງ 530 ສະຫາຍ (ບໍ່ລັດຖະກອນ 88 ສະຫາຍ), ມີສະມາຊິກກອງທຶນ 1,156 ສະຫາຍ ຍິງ 475 ສະຫາຍ. ນອກຈາກນີ້ໄດ້ເປີດຂະບວນການແຂ່ງຂັນ 2 ດີ 5 ເປັນເຈົ້າຜ່ານມາ ແລະ 5 ເປັນເຈົ້າໃນປະຈຸບັນໄດ້ 71 ກົມກອງ, ມີຮາກຖານໜ່ວຍເທົ່າກັບ 100%; ສະເພາະປີ 2017 ມີ 7 ຮາກຖານ 15 ໜ່ວຍ, ປະກາດຮັບຮອງ ແລະ ມອບໃບຢັ້ງຢືນສໍາເລັດ 71 ກົມກອງ, 29 ຮາກຖານ, 42 ໜ່ວຍ ເຊິ່ງເທົ່າກັບ 100%. ຈາກນັ້ນໃນພິທີ ທ່ານ ພອນໄຊ ຖົມປະດິດ ປະທານສະຫະພັນກຳມະບານແຂວງອຸດົມໄຊ ໄດ້ມອບໃບຢັ້ງຢືນຂະບວນການແຂ່ງຂັນ 5 ເປັນເຈົ້າ ຂອງສະຫະພັນກຳມະບານແຂວງໃຫ້ເມືອງ ເຊິ່ງກ່າວຮັບໂດຍ ທ່ານ ບຸນກຽນ ພິລາວົງ  ປະທານສະຫະພັນກຳມະບານເມືອງຮຸນ ພ້ອມດ້ວຍຄະນະ ແລະ ມອບໃບຍ້ອງຍໍຂອງສູນກາງສະຫະພັນກຳມະບານລາວ, ໃບຍ້ອງຍໍຂອງສະຫະພັນກຳມະບານແຂວງ ວ່າດ້ວຍການຍ້ອງຍໍກົມກອງລວມໝູ່ໃຫ້ແກ່ສະຫະພັນກຳມະບານເມືອງຮຸນ ເຊິ່ງປະທານໄດ້ຜັດປ່ຽນກັນມອບ.

          ເນື່ອງໃນໂອກາດດັ່ງກ່າວນີ້ ທ່ານ ຄຳພຽງ ຢາຈົງວາ ຮອງເລຂາ-ຮອງເຈົ້າແຂວງ ໄດ້ໃຫ້ກຽດໂອ້ລົມ ກ່ອນອື່ນໝົດ ທ່ານໄດ້ສະແດງຄວາມດີໃຈ ແລະ ຍ້ອງຍໍຊົມເຊີຍມາຍັງສະຫະພັນກຳມະບານເມືອງຮຸນ ທີ່ນຳພາສະຫະພັນກຳມະບານແຕ່ລະຂັ້ນ ຈັດຕັ້ງປະຕິບັດໜ້າທີ່ວຽດງານຢ່າງຮອບດ້ານ ໂດຍສະເພາະແມ່ນການຜັນຂະຫຍາຍຈັດຕັ້ງປະຕິບັດຂໍ້ແຂ່ງຂັນ 2 ດີ 5 ເປັນເຈົ້າ ໃນໄລຍະຜ່ານມາ ແລະ 5 ເປັນເຈົ້າໃນປະຈຸບັນ, ທ່ານ ໄດ້ຮຽກຮ້ອງໃຫ້ສະຫະພັນກຳມະບານເມືອງ ຈົ່ງພ້ອມກັນສືບຕໍ່ຈັດຕັ້ງປະຕິບັດເນື້ອໃນຂະບວນການແຂ່ງຂັນ 5 ເປັນເຈົ້າ ຂອງສູນກາງສະຫະພັນກຳມະບານ.