ຂ່າວໃໝ່ :

ຂ່າວ

ໃນວັນທີ 1 ຕຸລາ 2018 ນີ້ ທ່ານ ປອ ວິໄລວົງ ບຸດດາຄໍາ ຄະນະປະຈໍາສະພາແຫ່ງຊາດ ປະທານກໍາມະທິການແຜນການ, ການເງິນ ແລະ ການກວດສອບ ພ້ອມດ້ວຍຄະນະທິມງານ ໄດ້ລົງຊຸກຍູ້ ຕິດຕາມວຽກງານ ຢູ່ທີ່ເມືອງຮຸນ ແຂວງອຸດົມໄຊ  ໂດຍເປັນກຽດຕ້ອນຮັບຂອງທ່ານ ບຸນຄົງ ຫຼ້າຈຽມພອນ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງຮຸນ, ມີຄະນະປະຈຳພັກເມືອງ, ຄະນະພັກເມືອງ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ ເຂົ້າຮ່ວມ ເຊິ່ງທ່ານ ເຈົ້າເມືອງຮຸນ-ເມືອງຮຸນ ໄດ້ຂຶ້ນລາຍງານສະພາບໂດຍຫຍໍ້ ເປັນຕົ້ນແມ່ນ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ປະກົດການຫຍໍ້ທໍ້ຕ່າງໆ, ສະພາບໄພນ້ຳຖ້ວມ, ທິດທາງແຜນການຄາດໝາຍສູ້ຊົນ ໃນປີ 2019 ຂອງເມືອງ ແລະ ຄໍາສະເໜີຈໍານວນໜຶ່ງ ຕໍ່ ທ່ານ ປອ ວິໄລວົງ ບຸດດາຄໍາ ພ້ອມດ້ວຍຄະນະທິມງານຮັບຊາບ.

ຈາກນັ້ນ ທ່ານ ໄດ້ໃຫ້ກຽດໂອ້ລົມ ເຊິ່ງກ່ອນອື່ນ ທ່ານ ໄດ້ຍ້ອງຍໍຊົມເຊີຍຜົນງານທີ່ການນຳເມືອງຮຸນ ຍາດມາໄດ້ໃນໄລຍະຜ່ານມາ ພ້ອມກັນນັ້ນ ຍັງໄດ້ຮຽກຮ້ອງມາຍັງອົງການປົກຄອງເມືອງ ກໍ່ຄື ບັນດາຂະແໜງການຂອງເມືອງ ຈົ່ງພ້ອມກັນເປັນເຈົ້າການໃນການຄຸ້ມຄອງລັດ - ຄຸ້ມຄອງສັງຄົມດ້ວຍກົດໝາຍຢ່າງເຂັ້ມງວດ, ເຮັດວຽກຢ່າງມີແບບແຜນອັນລະອຽດ, ມີການຕິດຕາມ, ກວດກາ ແລະ ຄຸ້ມຄອງ ເສດຖະກິດ-ສັງຄົມ ໃຫ້ມີປະສິດທິພາບ, ຊຸກຍູ້ ແລະ ຊອກຫາແຫຼ່ງທຶນຊ່ວຍໃຫ້ພໍ່ແມ່ປະຊາຊົນບັນດາເຜົ່າ ໃນການປູກ-ການລ້ຽງໃຫ້ກາຍເປັນສິນຄ້າ, ສຶກສາຮົບຮົມໃຫ້ປະຊາຊົນບັນດາເຜົ່າມີຄວາມສາມັກຄີ ເປັນນໍ້າໜຶ່ງໃຈດຽວ ໃນການສ້າງສາພັດທະນາເມືອງຮຸນ ໃຫ້ກາຍເປັນເມືອງຕົວແບບທີ່ດີເດັ່ນ. ນອກນີ້, ທ່ານ ປອ ວິໄລວົງ ບຸດດາຄຳ ພ້ອມດ້ວຍຄະນະທິມງານ ໄດ້ລົງໄປຢ້ຽມຢາມ ແລະ ພົບປະໂອ້ລົມກັບຄະນະພັກຮາກຖານ ແລະ ພໍ່ແມ່ປະຊາຊົນບັນດາເຜົ່າ ບ້ານສາມສ້າງສີບຸນເຮືອງ.

ໃນວັນທີ 18 ກັນຍາ 2018 ນີ້ ໄດ້ເປີດກອງປະຊຸມເຜີຍແຜ່ເຊື່ອມຊຶມບັນດາມະຕິກອງປະຊຸມຂອງສູນກາງພັກ ຢູ່ທີ່ສະໂມສອນໃຫຍ່ຂອງເມືອງຮຸນ ແຂວງອຸດົມໄຊ ໂດຍການເປັນປະທານຂອງທ່ານ ບຸນຄົງ ຫຼ້າຈຽມພອນ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງຮຸນ, ມີຄະນະປະຈຳພັກເມືອງ, ຄະນພັກເມືອງ, ຫົວໜ້າ-ຮອງຫົວໜ້າຫ້ອງການ, ສອງກອງບັນຊາການທະຫານ-ຕຳຫຼວດ, ຄະນະພັກຮາກຖານກຸ່ມບ້ານ ແລະ ນາຍບ້ານ 10 ບ້ານເທດສະບານ ເຂົ້າຮ່ວມ.

ກອງປະຊຸມດັ່ງກ່າວ ໄດ້ຮັບຟັງການເຜີຍແຜ່ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ VI ສະໄໝທີ X, ມະຕິ ເລກທີ 037 ຂອງຄະນະບໍລິຫານງານສູກາງພັກ ວ່າດ້ວຍການຍົກສູງປະສິດທິພາບການຄຸ້ມຄອງລັດ ແລະ ສັງຄົມດ້ວຍກົດໝາຍ ແລະ ໄດ້ຜ່ານຄຳສັ່ງ ເລກທີ 04 ຂອງຄະນະເລຂາທິການສູງກາງພັກ ວ່າດ້ວຍການກະກຽມດຳເນີນກອງປະຊຸມໃຫຍ່ 3 ຂັ້ນ ແລະ ແຜນດໍຳເນີນງານ ກອງປະຊຸມໃຫຍ່ອົງການຈັດຕັ້ງມະຫາຊົນ ແລະ ກອງປະຊຸມໃຫຍ່ 3 ຂັ້ນຂອງເມືອງ. ຈາກນັ້ນ ທ່ານ ບຸນຄົງ ຫຼ້າຈຽມພອນ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງຮຸນ ໄດ້ໃຫ້ກຽດໂອ້ລົມ ແລະ ຍົກໃຫ້ເຫັນຫຼາຍດ້ານ ເປັນຕົ້ນແມ່ນ ການຈັດຕັ້ງປະຕິບັດມະຕິກອງປະຊຸມໃຫຍ່ ສະໄໝທີ X ຂອງພັກ ແລະ ບາງໜ້າວຽກທ້າທາຍທີ່ຕ້ອງໄດ້ສຸມໃສ່ແກ້ໄຂໃນສະເພາະໜ້ານີ້ ໃຫ້ສໍາເລັດ ແລະ ໃຫ້ປະກົດຜົນເປັນຈິງ.

ວັນທີ 8 ກັນຍາ 2018 ນີ້ ຄະນະພັກ, ການນໍຳເມືອງຮຸນ  ໄດ້ຕ້ອນຮັບຄະນະທິມງານຂອງ ທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງ-ແຂວງອຸດົມໄຊ ໂດຍເປັນກຽດຕ້ອນຮັບຂອງທ່ານ ບຸນຄົງ ຫຼ້າຈຽມພອນ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງຮຸນ, ມີຄະນະປະຈຳພັກເມືອງ, ຄະນະພັກເມືອງ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ ເຂົ້າຮ່ວມຢ່າງພ້ອມພຽງ.

 

ຈຸດປະສົງຂອງການລົງມາຢ້ຽມຢາມໃນຄັ້ງນີ້ ແມ່ນເພື່ອລົງກວດກາເບິ່ງສະພາບຄວາມເສຍຫາຍຈາກໄພພິບັດນ້ຳຖ້ວມຢູ່ເມືອງຮຸນ ເຊິ່ງກ່ອນອື່ນ ທ່ານ ບຸນຄົງ ຫຼ້າຈຽມພອນ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງຮຸນ ໄດ້ຂຶ້ນລາຍງານສະພາບໂດຍຫຍໍ້ ໂດຍສະເພາະແມ່ນສະພາບຜົນຫາຍຈາກໄພນ້ຳຖ້ວມຢູ່ພາຍໃນເມືອງຮຸນ ຕໍ່ ທ່ານ ເຈົ້າແຂວງ ເປັນຕົ້ນແມ່ນ ເນື້ອທີ່ນາ, ສວນ ແລະ ໜອງປາ ເສຍຫາຍເປັນມູນຄ່າຢ່າງຫຼວງຫຼາຍ; ນອກຈາກນີ້ ຍັງມີດ້ານພື້ນຖານໂຄງລ່າງ ເຊັ່ນ: ເສົາໄຟຟ້າຫັກ, ທໍ່ນ້ຳປະປາແຕກ ແລະ ຖະໜົນຫົນທາງເປ່ເພ ເຮັດໃຫ້ການສັນຈອນໄປມາຫາສູ່ກັນຂອງປະຊາຊົນບັນດາເຜົ່າພາຍໃນເມືອງຮຸນພົບຫຍຸ້ງຍາກຫຼາຍສົມຄວນ. ຈາກນັ້ນ ທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງ-ແຂວງອຸດົມໄຊ ໄດ້ໃຫ້ຄຳເຫັນ ແລະ ທິດຊີ້ນຳ ໃນການແກ້ໄຂບັນຫາສະເພາະໜ້ານີ້ ຢ່າງຮີບດ່ວນ, ໃຫ້ແຕ່ລະພາກສ່ວນທີ່ກ່ຽວຂ້ອງຂອງເມືອງ ຈົ່ງພ້ອມກັນເປັນເຈົ້າການໃນການເກັບກຳຂໍ້ມູນຜົນເສຍຫາຍໃຫ້ລະອຽດ ຊັດເຈນ ເພື່ອລາຍງານຕໍ່ຂັ້ນເທິງຮັບຮູ້ ແລະ ຂະແໜງການທີ່ກ່ຽວຂ້ອງ ເພື່ອຊອກຫາຊ່ອງທາງໃນການແກ້ໄຂບັນຫາໃຫ້ທວງທັນກັບສະພາບການ.

ຕອນເຊົ້າຂອງວັນທີ 6 ກັນຍາ 2018 ນີ້ ຢູ່ທີ່ສະໂມສອນໃຫຍ່ຂອງເມືອງຮຸນ ພິທີປາຖະກາຖາເລົ່າຫວນຄືນມູນເຊື້ອ ວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 16 ປີ (9 ກັນຍາ 2002 - 9 ກັນຍາ 2018) ຂຶ້ນຢ່າງເປັນທາງການ ໂດຍເປັນປະທານຂອງ ສະຫາຍ ພັທ ທອງຈັນ ວົງປະເສີດ ພະນັກງານບຳນານ ອະດີດຄະນະນຳ ກອງພົນທະຫານຮາບ ທີ 3, ມີສະຫາຍ ພັຕ ຄຳພັນ ທອຍມາລາ ຄະນະບໍລິຫານງານສະຫະພັນນັກຮົບເກົ່າແຂວງອຸດົມໄຊ ປະທານສະຫະພັນນັກຮົບເກົ່າເມືອງຮຸນ ຕະຫຼອດຮອດ ຄະນະພັກ, ຫົວໜ້າຫ້ອງການ, ສອງກອງບັນຊາການທະຫານ-ຕຳຫຼວດ ພ້ອມພະນັກງານວິຊາການ ເຂົ້າຮ່ວມ 150 ກວ່າສະຫາຍ.

          ໃນພິທີດັ່ງກ່າວນີ້ ສະຫາຍ ພັຕ ຄຳພັນ ທອຍມາລາ ຄະນະບໍລິຫານງານສະຫະພັນນັກຮົບເກົ່າແຂວງ ປະທານສະຫະພັນນັກຮົບເກົ່າເມືອງຮຸນ ໄດ້ຂຶ້ນກ່າວຈຸດປະສົງວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 16 ປີ ຈາກນັ້ນ ສະຫາຍ ພັທ ທອງຈັນ ວົງປະເສີດ ພະນັກງານບຳນານ ອະດີດຄະນະນຳ ກອງພົນທະຫານຮາບ ທີ 3 ໄດ້ເປັນກຽດຂື້ນເລົ່າຫວນຄືນມູນເຊຶ້ອວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ເພື່ອລະນຶກເຖິງຄຸນງາມຄວາມດີໃນຖັນແຖວພະນັກງານນັກຮົບເກົ່າໃນພາລະກິດຕໍ່ສູ້ກູ້ຊາດ ແລະ ນຳເອົາຄວາມຢູ່ເຢັນເປັນສຸກມາໃຫ້ປະຊາຊົນລາວບັນດາເຜົ່າ ພາຍໃຕ້ການນຳພາຂອງພັກປະຊາຊົນປະຕິວັດລາວ ທັງນີ້ ກໍ່ເພື່ອເຕົ້າໂຮມຄວາມສາມັກຄີ ແລະ ສຶກສາອົບຮົມ ພະນັກງານລັດຖະກອນ, ພະນັກງານນັກຮົບ ໃຫ້ເປັນແບບເປັນຢ່າງໃຫ້ແກ່ຄົນລຸ້ນໃໝ່ ແລະ ສືບທອດມູນເຊື້ອອັນດີງາມດັ່ງກ່າວນີ້ ໃຫ້ຍືນຍົງຄຽງຄູ່ກັບພາລະກິດການປະຕິວັດຕະຫຼອດໄປ.

          ໃນຕອນເຊົ້າ ເວລາ 8 ໂມງ 30 ນາທີ ຂອງວັນທີ 1 ສິງຫາ 2018 ຢູ່ທີ່ສະໂມສອນໃຫຍ່ ເມືອງຮຸນ ແຂວງອຸດົມໄຊ ໄດ້ຈັດພິທີເຜີຍແຜ່ກົດໝາຍວ່າດ້ວຍສະຫະພັນກຳມະບານລາວ (ສະບັບປັບປຸງ) ໂດຍໃຫ້ກຽດຂຶ້ນເຜີຍແຜ່ຂອງທ່ານ ບຸນຄົງ ໄຊຍະຄຳ ຮອງປະທານສະຫະພັນກຳມະບານເມືອງ, ມີຄະນະບໍລິຫານງານສະຫະພັນກຳມະບານຂັ້ນເມືອງ, ປະທານກຳມະບານຮາກຖານໜ່ວຍຕະຫຼອດເຖິງພະນັກງານ ສະມາຊິກກຳມະບານພາຍໃນເມືອງເຂົ້າຮ່ວມ 100 ກວ່າຄົນ.

 

            ໃນພິທີດັ່ງກ່າວນີ້ ທ່ານ ບຸນຄົງ ໄຊຍະຄຳ ຮອງປະທານສະຫະພັນກຳມະບານເມືອງໄດ້ຍົກໃຫ້ ເຫັນຫຼັກການ, ລະບຽບການ,ມາດຕະການ, ການເຄື່ອນໄຫວ, ການຄຸ້ມຄອງ ແລະ ການກວດກາວຽກງານຂອງກຳມະບານລາວ ເພື່ອຮັບປະກັນການປະຕິບັດພາລະບົດບາດ,ສິດ ແລະ ໜ້າທີ່ຂອງຕົນ ໃຫ້ມີປະສິດທິພາບສູງ ແນໃສ່ເຕົ້າໂຮມກຳລັງແຮງ, ປົກປ້ອງສິດ ແລະ ຜົນປະໂຫຍດຂອງສະມາຊິກກຳມະບານ, ກຳມະກອນ ແລະ ຊາວຜູ່ອອກແຮງງານບັນດາເຜົ່າ. ໃນນີ້ ທ່ານ ຮອງປະທານສະຫະພັນກໍາມະບານເມືອງ ກໍໄດ້ຖືໂອກາດນີ້ ແຈ້ງໃຫ້ສະມາຊິກກໍາມະບານທຸກພາກສ່ວນ ກຳມະກອນຊາວຜູ່ອອກແຮງງານ ຮັບຮູ້ ແລະ ເຂົ້າໃຈກ່ຽວກັບການປະກາດໃຊ້ຄ່າແຮງງານຂັ້ນຕ່ຳ ເພື່ອຮັບປະກັນ ໃຫ້ແກ່ການປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກກຳມະບານ, ກຳມະກອນຊາວຜູ່ອອກແຮງງານບັນດາເຜົ່າໃນທົ່ວປະເທດ. ທ້າຍນີ້ ທ່ານກໍ່ໄດ້ຮຽກຮ້ອງໃຫ້ພະນັກງານ-ລັດຖະກອນ, ພະນັກງານຫຼັກແຫຼ່ງ, ທະຫານ-ຕຳຫຼວດຕະຫຼອດຮອດການຈັດຕັ້ງທຸກພາກສ່ວນທີ່ກ່ຽວຂ້ອງ ຈົ່ງພ້ອມກັນນຳເອົາເນື້ອໃນຈິດໃຈດັ່ງກ່າວນີ້ ໄປສືບຕໍ່ຜັນຂະຫຍາຍຕາມພາລະບົດບາດ, ສິດ ແລະ ໜ້າທີ່ ຂອບເຂດຄວາມຮັບຜິດຊອບຂອງຕົນ ໃຫ້ໄດ້ຮັບຜົນດີຂຶ້ນເລື້ອຍໆ.

ຕອນເຊົ້າຂອງວັນທີ 1 ທັນວາ 2017 ນີ້ ໄດ້ຈັດພິທີປະຖະກະຖາຫວນຄືນມູນເຊື້ອວັນຊາດ ທີ 2 ທັນວາ ຄົບ ຮອບ 42 ປີ ຂຶ້ນເປັນຢ່າງເປັນທາງການ ຢູ່ທີ່ສະໂມສອນໃຫຍ່ເມືອງຮຸນ ໂດຍການເປັນປະທານ ແລະ ຂຶ້ນປະຖະກະຖາ ຂອງ ທ່ານ ບຸນຄົງ ຫຼ້າຈຽມພອນ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງຮຸນ, ມີການນໍາຂັ້ນແຂວງ, ຄະນະປະຈໍາພັກເມືອງ, ຄະນະພັກ, ຫົວໜ້າຫ້ອງການ, ອາດີດການນຳ, ພະນັກງານບຳນານ-ອາວຸໂສ, ພະນັກງານຫຼັກແຫຼ່ງຂັ້ນເມືອງ ແລະ ອົງການປົກຄອງບ້ານ 10 ບ້ານເທດສະບານເຂົ້າຮ່ວມ 100 ກວ່າຄົນ.

ໃນພິທີທີ່ມີຄວາມໝາຍສຳຄັນນີ້ ທ່ານ ບຸນຄົງ ຫຼ້າຈຽມພອນ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງຮຸນ ໄດ້ເປັນກຽດເລົ່າຫວນຄືນມູນເຊື້ອ ວັນຊາດ ທີ 2 ທັນວາ ຄົບຮອບ 42 ປີ ກ່ອນອື່ນທ່ານໄດ້ຍົກໃຫ້ເຫັນຂະບວນການຕໍ່ສູ້ປົດປ່ອຍຊາດໃນແຕ່ລະໄລຍະ ກໍ່ຄື ການປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄື ການປົກຮັກສາໝາກຜົນຂອງການປະຕິວັດຂອງປະຊາຊົນລາວບັນດາເຜົ່າ ພາຍໃຕ້ການນຳພາຂອງພັກປະຊາຊົນປະຕິວັດລາວ. ພ້ອມດຽວກັນນີ້ ທ່ານໄດ້ຮຽກຮ້ອງໃຫ້ ອົງການປົກຄອງເມືອງ ທຸກພາກສ່ວນ, ຄະນະພັກ, ຫົວໜ້າຫ້ອງການ ແລະ ພະນັກງານຫຼັກແຫຼ່ງຂອງເມືອງ ຈົ່ງພ້ອມກັນສຸມສະຕິປັນຍາເຂົ້າໃນການຊີ້ນຳ-ນຳພາ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງອົງຄະນະພັກເມືອງຮຸນ ກໍ່ຄື ແຜນພັດທະນາເສດຖະກິດ-ສັງຄົມຂອງເມືອງຮຸນ ໃຫ້ບັນລຸຕາມລະດັບຄາດໝາຍ.